Hjálparhundar Íslands standa fyrir hæfnimati á hjálparhundum tvisvar sinnum á ári. Hér að neðan eru upplýsingar um matið. 

Hæfnimatið fer fram í margmenni, á opinberum stað sem er aðgengilegur fyrir fólk með hreyfihömlun. Á svæðinu er mismunandi undirlag, tröppur, lyfta, sjálfvirkar hurðir, þröngir gangar og húsgögn. Hundur þarf að vera að lágmarki 18 mánaða og uppfylla kröfur um heilbrigði. Jafnframt þarf að sýna fram á að hundurinn hafi hlotið þjálfun sem hjálparhundur hjá viðurkenndum þjálfara eða undir leiðsögn þjálfara sem viðurkenndur er af stjórn Hjálparhunda Íslands. Stjórnandi hunds í prófi skal vera að lágmarki 18 ára og vera skráður meðlimur í Hjálparhundum Íslands.

Nánari upplýsingar um matið er að finna hér á heimasíðu félagsins en einnig er áhugasömum bent á að senda fyrirspurn á netfangið hjalparhundar@gmail.com

Í taum

Hegðun hunds í taum og fylgd hans við eiganda er metin í gegnum prófið. Teymið gengur að og frá byggingu, innan byggingar og inn og út um hurðar.

​

Án taums

Hundur undir stjórn án taums. Þótt hundur eigi aldrei að vera án taums í vinnunni geta slíkar aðstæður komið upp. Eigandi sleppir taumnum og gengur á svæði sem samsvarar 4 fermetrum með hraðabreytingum, beygjum og snúningum.

​

Aðskilnaður við eiganda

Ókunnug manneskjan heldur í taum hunds og eigandi gengur í burtu. Slíkar aðstæður geta komið upp við slys eða í annars konar neyðartilvikum. Eigandi er í 6 metra fjarlægð frá hundi og ókunnugu manneskjunni og stendur þar í 20 sekúndur. Manneskjan á ekki í samskiptum við hundinn. Eigandi kallar að lokum á hundinn til sín í tveggja metra fjarlægð.

​

Að mæta hundi

Eigandi stillir sér upp með hundinn við hlið sér. Manneskja með hund gengur fram hjá nokkrum sinnum í innan við 1,8 metra fjarlægð frá prófhundi og eiganda hans. Hegðun og  viðbrögð hunds eru metin.

​

Hljóð

Viðbrögð hunds við truflun. Matsmaður missir skrifbretti þannig að hávaði skapast. Fylgst er með viðbrögðum hundsins. 

​

Mannmergð

Viðbrögð hunds við þröngum aðstæðum. Starfsfólk prófs hópast kringum teymið í tveggja metra fjarlægð og nálgast það samtaka þar til það staðnæmist alveg upp við teymið.

​

Hjálpartæki

Manneskja gengur fram og tilbaka fyrir framan teymið nokkrum sinnum með eitthvað af eftirfarandi: innkaupakerru, hækjur, hjólastól. Hundur á að vera í skipun (liggja, sitja standa) þangað til hann er losaður úr henni. Fylgst er með viðbrögðum hundsins.

​

Hundur skoðaður

Viðbrögð hunds við að vera skoðaður af ókunnugri manneskju. Teymið er í kyrrstöðu og hundur á hæl. Manneskja kemur  og heilsar eiganda. Því næst klappar hún hundi og heilsar.

​

Lyfta

Teymið fer í lyftu. Prófað er hvernig hundinum gengur að bíða eftir lyftu, bíða eftir að fólk fari út úr lyftunni og að ganga út úr lyftunni um leið og hurðin opnast. Hegðun hunds í lyftunni er einnig metin.

 

Stigi

Eigandi gengur með hund í taum upp og niður tröppur innan verslunarmiðstöðvar. 

Sjálfvirk hurð

Teymið gengur út úr byggingu. Eigandi stendur í nokkrar sekúndur við sjálfvirka hurð sem opnast. Við skipun matsmanns gengur eigandi og hundur út um hurðina. Teymið mætir öðru fólki á leiðinni út. 

​

Matur/lykt

Hegðun hunds í kringum mat er skoðuð á veitingastað. Matsaðili og eigandi setjast niður á veitingastað. Fylgst er með hegðun hundsins á meðan. 

​

Bílaumferð

Viðbrögð hunds við bílaumferð fyrir utan byggingu. Hér er tekið tillit til hegðunar hunds í upphafi og við lok mats.